270°維港觀景台 海港城打造新地標

唔知各位姊妹鍾唔鍾意對住個海放空呢？黛安就好鍾意望海，尤其係尖沙咀海港城嘅海景真係一流，令人百看不厭。好快海港城又有新嘅望海好地方，黛安噚日同海港城公關姊妹食晏，聽講2013年開始擴建嘅海運大廈伸延大樓工程即將完工，今年第四季就會開幕，最大賣點之一係「270度維港觀景台」，相信可以成為香港新地標。

海港城由2012年就計劃擴建，公關姊妹話，呢座位於海運大廈末端、樓高5層、三面環海嘅伸延大樓，總面積有10萬呎，係由國際知名建築師事務所Foster + Partners設計，團隊特意打造咗「270度維港觀景台」，相信可令處於維港中心獨特地理優勢嘅新大樓更加出眾。

擁11間海景餐廳 全新郵輪碼頭

新大樓每層都設有寬敞嘅觀景台，免費開放畀公眾，遊人可以喺觀景台飽覽270度無敵維港景色，將港島同九龍半島兩岸嘅美景盡收眼簾，而且觀景台臨海向西，約埋三五知己，一齊shopping完再欣賞香港日落同夜景，簡直係一大樂事。

場內仲有11間海景餐廳，同埋全新嘅郵輪碼頭出入境大堂，預計今年內會陸續開業及投入服務。聽講海港城都好期待觀景台開幕，希望可打造成為香港市民同遊客必到嘅景點，令大家以全新角度、近距離體驗維港美景。