柏寧酒店開Party 輕酌烈酒抽雪茄

近年，城中興起雪茄配搭威士忌嘅熱潮，黛安知道專門介紹威士忌與烈酒嘅雜誌《Malt & Spirits》，今個月底將舉行全港首個「烈酒配雪茄派對」。上星期仲舉辦咗一場預覽會，邀請來賓滙聚銅鑼灣柏寧酒店天台花園，率先品嘗幾款精選雪茄與烈酒嘅配搭。

《Malt & Spirits》係葡萄酒雜誌《酒‧派》的姊妹刊物，由從事廣告及出版業逾15載嘅創意人蕭乃新（Nelson）出版。此外，集團每年都會舉辦葡萄酒比賽、最佳美酒配佳餚食肆頒獎禮、日本清酒巡禮及今次嘅烈酒配雪茄派對，今年集團更於黃竹坑開設開放式廚房食堂Luxe Culinary，邀請國際米芝蓮星級名廚來港獻技，Nelson話他嘅心願係將旗下業務做好，並於兩年後上市。

下周六舉行

預覽會當天雖烈日當空，室外氣溫高達30幾度，但無礙大家於露天花園品嘗雪茄配烈酒嘅雅興。當日黛安仲見到《晴報》社長麥華章，佢都係雪茄配威士忌愛好者，尤愛抽濃味嘅古巴雪茄，配搭重口味嘅蘇格蘭Islay威士忌，話咁樣更可帶出呢個島嶼所產威士忌嘅泥煤、煙熏、海水、礦物及藥水味嘅粗獷感覺。

如果你都想參與呢場精采派對，不妨於下周六（6月24日）來到柏寧酒店。現場仲會舉行雪茄品味大師班、雞尾酒工作坊、烈酒及雪茄配對大師班等豐富節目，不容錯過！