超級英雄登陸迪士尼 推香港限定Marvel漫畫

漫畫世界自有無窮宇宙，當中創意同幻想隨時嚇你一跳。好似好受大人細路歡迎嘅Marvel超級英雄系列，唔止早前降臨迪士尼開咗個「神盾局」香港支部，仲出埋全球首本喺迪士尼獨家發售嘅限定Marvel漫畫《Iron Man Experience︰Hong Kong Heroes #1》，故事由鐵甲奇俠同幾位超級英雄做主角，聯手保護香港嘅神秘寶物，真係好令人期待後續進展。

黛安仲八卦到，原來本漫畫香港人都有份畫㗎！Marvel團隊特別安排咗駐香港漫畫作家黃孝勇，以及香港畫家黃毅龍，用咗兩個月時間度蹺同作畫，仲會安排一個新嘅超級英雄喺漫畫，登場對抗邪惡勢力𠻹。亞洲漫威品牌管理及發展副總裁司馬博都話︰「香港係一個最佳選址，誕生一個全新嘅故事及亞洲英雄。」

拎特工證執行任務

想做超級英雄，當然唔止得個睇字啦。公關姐妹話迪士尼即日至9月3日推出了全新「Marvel夏日超級英雄」主題活動，入場市民可即席加入神盾局做特工，拎埋「特工身份證」及「特工委任證」去執行任務，幫雷神托爾、星爵、黑寡婦和鷹眼等消滅敵人；首1,000個完成任務嘅特工仲可獲贈限定版Marvel漫畫𠻹！據講迪士尼推出咗「鐵甲奇俠飛行之旅」之後，到訪嘅男性賓客數量錄得雙位數增長，未來會加碼推出更多用超級英雄做主題嘅活動！