中國嘉德 月底拍賣張大千名畫

踏入5月，又係各大拍賣行搞春季拍賣會嘅時候。若手頭上資金唔鬆動，其實欣賞下預展，提升個人藝術修養都唔錯！昨日黛安同中國嘉德（香港）負責人食飯，原來佢哋將於本月27至30日舉行春季拍賣會。今次拍賣有4大主題，包括中國古今書畫、亞洲20世紀及當代藝術、瓷器工藝及明清古典家具，預展期27日就開始，有逾千件精選拍品，真係目不暇給。

拍品包括逾廿件張大千作品，如展覽圖冊封面嘅《春雲曉靄》，呢幅係大師83歲時嘅潑墨潑彩巨製，整幅逾六平方尺，底價500萬至800萬；至於當代作品，最吸引眼球係村上隆公司旗下最受歡迎藝術家高野綾嘅作品《平行空間的歡聚》。不得不提古典家具部分，嘉德工藝品部總經理喬皓同黛安講，其中一件明末清初嘅「黃花梨螭龍紋六柱架子床」，底價達900萬至1200萬，佢講笑話以前大富家庭買個丫環、有張黃花梨床就係「重要財產」。