銅鑼灣Samsung體驗館 試用Galaxy S8 玩VR遊戲

早幾日黛安喺又一城行街，見到Samsung擺booth展示最近嘅旗鑑手機Galaxy S8，吸引咗唔少市民去試玩同查詢。當時黛安都有入去試用部新機，感覺好流暢，機身夠纖巧之餘，極幼邊框嘅設計令個mon睇落好大，整體設計好型，搞到黛安心思思想出番部新機。原本黛安都想試玩埋佢嘅VR裝置，不過實在太受歡迎，好多人排隊，加上又趕時間，只好作罷。

怡東廣場設多個專區

咁啱昨日公關姊妹話畀黛安聽，原來Samsung即日至6月4日，喺銅鑼灣怡東廣場設置咗一個Samsung Galaxy Studio體驗館，可以彌補黛安日前未有試玩VR裝置嘅遺憾。該處分咗幾個主題區，除咗可以試用Galaxy S8及S8+，另又有Samsung Pay專區，等大家體驗流動支付嘅便捷；仲有一個健身遊戲區域，戴上Samsung Gear S3試玩體感網球及游水games，就可監測心率同運動表現；當然唔少得黛安最感興趣嘅Gear VR 4D動感體驗區啦，到時可以坐喺左右搖擺嘅凳上，以全新Gear VR配動態控制器玩虛擬實境射境遊戲，令人恍如置身太空船駕駛艙一樣。黛安搵日得閒一定要去慢慢體驗至得！