遊客鍾意食澳牛 港人愛落蘭桂坊

依家科技咁發達，黛安都習慣咗每去一個地方就打個卡，表示「到此一遊」。旅遊規劃和預訂平台TripAdvisor最近推出首個流動「Check-in」指數，發現海外遊客同當地人最常打卡的酒店、餐廳和旅遊景點好唔一樣。

台北人 愛訪華山文創區

以香港為例，海外遊客最鍾意去迪士尼樂園及太平山頂玩兼睇景，最愛食肆係廟街香辣蟹同「澳牛」（澳洲牛奶公司）；香港人就鍾意去鴨寮街，同埋去蘭桂坊chill，鍾意食「貼地」大牌檔，包括「陳根記」和「東寶小館」。當然都有部分口味係一致，例如女人街同埋中式點心食肆「一點心」，都係兩者同好。

而遊客同當地人到訪台北，一樣必去地標「台北101大樓」、必食鼎泰豐同Ice Monster（永康冰館）。不過，遊客愛去「士林夜市」、食「永康牛肉麵」，地頭蟲則愛到訪「華山1914文化創意產業園區」、食「林東芳牛肉麵」；日本大阪方面，遊客同當地人都一樣鍾意去日本環球影城同購物天堂「道頓堀」。

TripAdvisor透過智能手機的GPS和動作感應器獲得旅人的打卡資訊，得出以上流動「Check-in」指數，發現幾項得意趨勢，包括無論係遊客或當地人都偏向選擇高度評價的熱點。不過，喺某啲城市，兩者嘅偏好又有明顯差異。如果想去個特別嘅旅行，不妨睇下當地人特別的check-list！