景福玉器展明日開鑼 教揀美玉襯靚衫

古時，貴族皇室、文人雅士都對美玉情有獨鍾。儒家孔子更喻君子如美玉，可見「玉」地位舉足輕重。其實無論美玉定其他珠寶首飾，黛安一樣咁鍾意，所以當我得知景福珠寶集團聽日（28/5）首次舉辦名為「世說翡翠」的玉器展，當然大感興趣啦！

配深色衫 大方得體

昨日黛安率先去景福睇預展，聽講今次展覽的重頭戲，係創辦人楊志雲送畀太太的結婚周年禮物「翡翠龍鳳鏈」，背後有一段好浪漫嘅愛情故事㗎！話說楊老先生當年買咗一條「龍玉」項鏈，一直想搵塊襯得起佢嘅玉裝上去，有次佢喺英國，無意間就畀佢喺古董店發現雕工、玉色都同原本塊「龍玉」極之匹配嘅「鳳玉」，就將佢鑲上項鏈，構成龍鳳呈祥圖案送畀太太，真係好sweet！

同場唔單止有靚珠寶睇，仲有集團美術總監侯旦丹（Danielle）教黛安用玉器首飾襯衫。佢話着沉色衫時可配搭碧綠色的玉器，出席隆重活動，顯得大方得體；着淺色衫則可襯番淡紫色的玉飾，令成個人顯得青春活潑，又不失優雅。

今次呢個玉器展，特選出300多件玉器展覽，部分更是珍藏咗10多年才首次公開，聽日限定1日在中環畢打街分店舉行；而6月更舉辦足金金器展覽，節目豐富。