關育材退而不休 繼續做煤氣顧問

中華煤氣執行董事暨營運總裁關育材（James）做埋今日榮休，煤氣常務董事陳永堅（Alfred）星期一晚喺跑馬地山光道馬會會員會所搞咗個Farewell Party。政務司司長林鄭月娥、運輸及房屋局副局長邱誠武、前保安局局長黎慶寧等政界名人都有出席，真有面子。

雖然James未到退休之齡，但想多啲時間陪屋企人，所以決定提早退休。聽Alfred講，James75年起加入煤氣公司，一做就係38年。本身是港大工程系畢業嘅佢，最先入職工程策劃部。七、八十年代之前，大部分市民都用緊石油氣及火水爐煮食，其後港督麥理浩着力發展衞星城市及興建公屋，邀請煤氣公司鋪設煤氣管道入屋，提升市民生活質素，當時不少項目James都有參與，仕途扶搖直上，89年躍升為煤氣首位華人工程科總經理，回歸時更被委任入董事會，03年起擔任營運總裁至今，涉獵工程、市務、營銷各範疇，可謂踏遍煤氣公司每個角落。

黃維義接棒

告別長工後，James仍會擔任煤氣公司高級顧問，協助籌備2014年由香港作東道主主辦的煤氣博覽，真是退而不休，因此同事們每星期都可繼續見到佢。

James退下火綫，煤氣公司亦早已覓得良將接任，他正是煤氣內地公用業務總監黃維義（Peter）。Peter曾任公司財務總監，本身亦是港華燃氣執行董事暨行政總裁，擁有豐富的內地人脈及經驗。黛安記得Peter去年更獲《福布斯》選為「2012年中國上市公司最佳CEO」，相信以其個人所長會助煤氣發展更上一層樓。