水務署添工程師 為傳媒解難

過去兩個月聽到不少水務署嘅新聞，上個月署長馬利德因為大埔濾水廠擴建，批出32億工程合約；上星期又話搵唔到工廈安置旺角office，決定喺天水圍天柏路興建新大樓。

每逢有新聞公布，公關部就忙於答傳媒查詢，如涉及工程細節，就要問番專業人員先知，好在公關部有高級工程師彭國勳（Gabriel）坐鎮，屋企部手提電腦連接公司server，隨時候命。但有時查詢太多，Gabriel都踢晒腳。好在從上年十月開始，佢哋有位新嘅工程師David Wong加入，多個幫手，難怪同事都話Gabriel笑容燦爛咗！

慳水未必慳錢？

黛安噚日同水務署公關食飯，收到佢哋最新嘅年報，原來全港有14％住戶用水少於12立方米而免交水費。不過，有時慳水未必等於慳錢，好似基層劏房戶咁，幾家人共用一個水錶，累進制收費下，點計都唔着數，有啲無良業主更濫收費，認真陰公。問水務署可否幫住戶分拆水錶？公關就答唔得，因為按規例每個單位只獲配一個水錶，對此類投訴愛莫能助。

除咗呢類個案，佢哋亦接過市民投訴食水唔乾淨，但查明後發現是大廈本身喉管老化或無清洗水缸，呢啲都要靠業主自理。

下星期五（22日）係「世界善用食水日」，水務署計劃推行一個慳水運動，希望大家每日用少十公升水。

復活節假期（29日）開始，署方又會喺科學館搞展覽，仲請咗幾位星級教授同醫生，從科學、中港資源、健康等角度認識食水，不妨留意。