必勝客BIG BOX 遊戲效應外賣增

去年底香港必勝客市務董事梁清松（Richard）同黛安預告，今年初推出手機App，大玩360度宣傳。相信緊貼潮流嘅你，已經知道黛安想講嘅就是最近勁hit嘅「BIG BOX滋味大盒作戰」。

平時啲手機遊戲，好多只能一個人玩，必勝客嘅新App就好唔同，最少兩個人先可以start game；大家拎住兩部唔同型號嘅手機，輸入團隊代號，兩個「芒」即可合二為一，一齊作戰，鬥快食晒大盒內的美食。黛安試過同男友二人組隊；亦曾與姨甥仔女參與四人挑戰，個個玩到頭撞頭，充分體會咩叫「獨樂樂不如眾樂樂」。玩得叻仲可以贏走Pizza Card免費擦番餐，每星期都有人獲獎。

遊戲籌備費心思

聽Richard講，個game用咗六位數嘅資源研發，足足籌備咗九個月，無論Layout抑或背後嘅技術都付出好大心機。好在Richard嘅努力並無白費，聽講遊戲推出個幾月，已有八萬幾人玩過，Unique visitors亦有三萬幾人，連Richard都話反應超預期。早前佢哋喺巴士車身賣廣告，又搞咗個巴士Snap Shot比賽，黛安喺Facebook見到唔少人參加。

開心時刻由餐廳伸延至手機，再從遊戲回歸家中桌面，新的推廣策略成功吸納一批BIG BOX外賣客，除咗年輕一輩，Richard意外發現多咗一批Office及家庭客，連Tea time外賣生意都好咗。有時放工返屋企，見到隔籬屋食完BIG BOX扔出來的大盒，自己都會心微笑。

稍後佢哋除咗會增加BIG BOX的食品撰擇外，仲會聯同其他公司一齊做Joint promotion，各位粉絲留意啦！