康宏王利民 帶同事北極長跑

踏入四月，北風依然吹個不停，反常天氣令人不得不正視全球暖化的嚴重性。從Facebook得悉Green Monday創辦人之一魏華星及執行總監陳貝兒，日前拉隊出發到北極，參加每年一度的馬拉松，希望喚起港人對冰川溶化及全球暖化的關注。聽講當地氣溫只有攝氏零下30度，黛安都關心佢哋如何克服極地嚴寒天氣，完成呢項創舉。

其實，北極馬拉松自02年起舉辦，至今已踏入第11屆，本港首次派代表出賽。以為參賽者係職業跑手，睇清楚名單先發現，原來佢哋都係同大家一樣坐慣辦公室嘅上班族。今次出戰的香港代表，包括康宏金融集團主席王利民（Quincy）及四位理財顧問。

極地長跑彰康宏理念

Quincy跑得，業界無人不知，黛安仲記得早年佢用咗七日時間，征服撒哈拉沙漠長跑，因此今年佢話到地球另一端馳騁，黛安亦不感意外。但極地天氣唔係咁易克服，所以佢早前已同一班同事積極備戰，喺冰房踩單車適應，又跑山練氣，非常落力。日前佢哋起行，極地探險家李樂詩博士都有去機場送機兼打氣。

除咗北極馬拉松，康宏仲派咗十位理財顧問到撒哈拉，延續Quincy的精神，參加全長254公里沙漠長跑，幫家貧的大學生籌款交學費。

查實做金融使乜做到咁辛苦呢？Quincy就話希望透過呢啲活動，令更多人認識公司理念喎。今年適逢係康宏成立20周年，公司打算將同事嘅奮鬥經歷拍成影片，遲下喺電視有得睇。