田北辰嫁女 喜餅幫襯社企

近日政商界真係喜事重重，繼晴報社長麥華章月初喺英國嫁女後，G2000老闆兼新民黨副主席田北辰嘅千金田植鏘（Lavina），明天亦會同男友拉埋天窗。田二少噚日送來嫁女餅，請黛安及同事享用，入面仲夾住一張寫住「我榮升外父Ｖ1.0了！」嘅賀卡，充分反映田二少嘅喜悅。

Lavina係田二少嘅三千金，同家人關係一向好好，之前田二少參選區議會同立法會，佢都有份落區拉票。Lavina本身亦係叻女一名，早兩年先喺波士頓讀完工商管理碩士課程，一畢業就畀大公司羅致，而且為人有善心。黛安記得早兩個月，Lavina親自設計一批便服鞋，佢話每賣出一對，就會捐15份飯餐畀一間NGO，向蒙古小孩提供膳食。今次送來嘅喜餅，亦特登幫襯東華三院社企愛烘培麵包工房（iBakery），每塊都由殘疾人士製造，心意十足。

田二少雙喜臨門

黛安聞說，Lavina嘅未來老公許建邦（Jonathan）從事金融業，田二少對未來女婿讚口不絕，話佢轉數快，人品又好。一對新人聽日下晝先會喺中環聖約翰座堂行禮，夜晚就會喺洲際酒店筵開百席宴客，遲啲蜜月旅行會去非洲睇動物。

Lavina嫁完之後，下個月就到姐姐、田二少嘅大女田植恩（Lauren）嫁人，結婚對象有自己嘅生意。兩個寶貝女同期出嫁，田二少話好唔捨得，可惜呢排立法會工作太忙，都無多抽時間陪佢哋。