《明報》《新報》現人事變動

現代傳播去年底獲彭博授權出版《彭博商業周刊》中文版，前晚黛安去咗其創刊酒會，主人家現代傳播董事長邵忠滿場飛招呼賓客，同場亦遇多位傳媒界前輩，並從佢哋口中獲悉《明報》及《新報》嘅人事變動。

聽講年屆退休之齡嘅《明報》編務董事翁昌文，今個月上旬已辭職退休，只保留世華媒體董事主席助理之職。佢留下嘅編務董事空缺，已由《明報》加拿大行政總裁兼編務總監呂家明接掌，呂家明已由加回港履新，全權負責香港《明報》編輯部事務，並會直接向世華媒體董事主席張曉卿匯報。

呂家明曾任《壹周刊》副總編輯，90年代中期移民加拿大，隨即獲《明報》羅致，主理《明報》於多倫多及溫哥華等地業務，深具傳媒管理經驗。

隱形富豪唔憂做

另黛安獲悉，《新報》現任社長馮兆榮亦已請辭，將於八月卸任。據悉《新報》已請來曾在東方報業集團旗下報刊任編輯部高層嘅葉德輝，下星期一開始出任副社長，處理馮兆榮過渡期間嘅工作，由此來看，社長之職很大機會由葉德輝補上。

馮兆榮已是「兩進兩出」《新報》，第二次回巢主要是基於與老闆楊受成嘅交情。唔講唔知，其實佢係傳媒界嘅隱形富豪，與太太投資有道，尤於西營盤一帶擁有多層物業，榮休在即，終於可好好享受人生了。

永隆送機票 吸年輕客

黛安噚日去咗旺角接機。旺角？你無聽錯，事關永隆銀行為咗做宣傳，喺銀行中心搭咗個機艙，噚日黛安獲永隆銀行助理總經理及零售銀行部主管鍾少權（Derek）之邀去接機。

一去到就聽到廣播：一班由曼谷出發嘅客機即將抵達，無耐Derek就喺空姐陪同下落機。佢之所以透過咁特別嘅形式出場，係因為永隆Xcite Visa白金卡剛推出新優惠，送出香港來回曼谷機票做迎新禮品，相信會受年輕人或熱愛旅遊人士歡迎。

其實Derek本身亦經常外遊，早幾個月佢由星展銀行過檔永隆之前，曾於台灣踩單車環島遊，最近又去過美國，出席佢22歲嘅寶貝囡嘅大學畢業禮，佢嘅千金主修傳理，聽講遲下想返香港發展。

爆胎等拖車 其間賞日落

Derek又同黛安講，遊美期間發生咗一段小插曲：當佢由聖地牙哥揸車去三藩市時，車胎不幸被碎石𠝹爆，佢足足喺鄉郊地方等咗幾個鐘先有拖車到。但佢非但無埋怨，仲話好享受喺郊區睇日落同觀星嘅時光。

講返工作，雖然Derek只係過檔永隆幾個月，但已幫公司諗好一系列發展大計，除咗計劃喺三年內，翻新約30間永隆分行，另會活化公司屬下嘅旺角銀行中心，包括擴大旅遊中心嘅面積，七月開始大家就會睇到商場嘅新型象。