黃毅力奪新加坡蓮花總代理

日前遇汽車零售商、富利堡集團主席黃毅力（Eric），佢同黛安分享一個好消息，作為蓮花跑車香港總代理嘅富利堡，九月再下一城，做埋新加坡蓮花跑車總代理。擁有直升機駕駛執照嘅Eric，特登揀咗今早11點半，喺九龍城香港飛行總會總部開記者會，公布佢將舉辦與該跑車有關的一項盛事。

今年適逢係澳門格蘭披治大賽車60周年，據悉熱愛賽車嘅Eric席間會宣布，佢會喺今年11月澳門大賽車期間，舉辦一項大中華杯賽事，邀請中、港、澳、台兩岸四地的著名賽車手參加，參賽車手不限國籍，但車輛就規定一定要選用無改裝過嘅1,600cc蓮花跑車。初賽今個星期喺廣州三水舉行，總決賽則喺11月14至16日展開。聽講香港著名賽車手潘炳烈、泰國車神拿泰活、澳門三級方程式賽車手何向強都會參賽。黛安男友聽到亦十分雀躍，看來比賽定會相當精采。

生意成功 不敵貴租

難得見到Eric，黛安亦順便問佢飲食生意做成點。近年，Eric在港九各處大展拳腳，開咗六間食肆，包括四間香港茶餐廳、一間潮州菜館及一間日本拉麵店。Eric苦笑，雖然生意成功，可惜仍不敵貴租，每次與業主傾租約，對方均開天索價喊加租兩倍，眼見生意難做，Eric已忍痛結束四間食肆，現僅餘兩間香港茶餐廳繼續經營，一間位於尖沙咀科學館道，早前與業主多番商談，終在加租50％條件下續約；另一間位於黃大仙的領匯商場內，租約十月完結，命運如何，有待落實。