王維基「靠癲靠勤力」圓夢

上星期應《晴報》社長兼CTgoodjobs行政總裁麥華章嘅邀請，去咗理工大學聽求職講座「奇招推銷自我講座」，嘉賓甚有分量，有「魔童」之稱嘅香港電視主席王維基（Ricky）同網絡紅人司徒夾帶都係講者，黛安聽完二人分享咩係「黃金十年」後，都獲益良多。

Ricky話佢自細好窮，全家住在五、六十呎的地方，細個嘅夢想係開好多公司賺好多錢，讀書時已向同學賣水貨書搵真銀。點解咁努力？佢認為係源於自卑：外形矮小、無女仔鍾意、讀書唔叻，幸好佢懂得將自卑化為力量。他話自己興趣係解難，別人視之為困難嘅嘢，佢則當娛樂。好似20年前打入電訊業，其後做香港寬頻，逐條街、逐層樓鋪光纖，兩者都非易事，當年亦有人認為佢嘅行為匪夷所思，但Ricky認為「人生就係匪夷所思先過癮」，最後佢終憑「夠癲夠勤力」成功，但圓夢後反覺空虛，因此Ricky鼓勵大家積極尋夢，因為擁有夢想，才擁有人生嘅黃金時間。Ricky又認為，追夢過程不要聽太多人的意見，想做就做，因為鼓勵的人很少，正如佢搞免費電視，一樣有人唔睇好，但佢自己仍然對目標有信心。

伸手爭取必有所獲

至於靠「抽水」聞名YouTube嘅司徒夾帶，則鼓勵大家發掘自己嘅天份去發揮。佢認為呢個世界機會很多，加上很多人「好hea」，只要「肯爭」、肯伸手去攞，無理由一無所獲。

二人演講生動，場內不時伴以笑聲及掌聲，黛安與過千名觀眾都聽得好開心。如果大家有興趣，可瀏覽www.CTgoodjobs.hk/KJ10重溫節目。