孫國林催員工生育 抗人口老化

黛安噚日託恒基兆業地產集團執行董事孫國林之福，睇咗一場精采表演，舞蹈員捧住紅噹噹嘅燈籠翩翩起舞，甚具特色。呢班舞蹈員全部都係長者，但舞姿靈巧，同年輕人有得揮。點解有表演睇？事關樂善好施嘅恒基每年都會定立主題做善事，適逢今年主題係「耆樂年」，所以特登邀請一班「老友記」獻技。

善心加碼 惠長者基金

孫國林話，好多長者年輕時要養家，無機會讀書就投身社會工作。三年前，理工大學成立專為長者而設嘅活齡學院，佢知道後大力支持，噚日仲即席捐咗20萬畀理大。佢仲話，如果有退休員工想進修，恒基不但會保薦佢哋入學，仲會出埋學費，真係良心老闆。

其實，孫國林一向支持長者工作。香港電影金像獎「終身成就獎」得主、現任社區關護長者基金理事黎筱娉（Terry）噚日同黛安講，幾年前向孫提及自己從事長者照顧工作，對方已甚支持，上年孫娶新抱請飲，更將20幾萬禮金捐予長者基金，噚日又加碼，再捐50萬元，其善心大大感動Terry。

支援長者工作固然重要，但孫認為「生多啲」先至係對抗人口老化嘅最佳辦法。

為咗「催谷」員工生育，今年恒基將侍產假增加至五日，嚟緊仲考慮向員工送奶粉！未知孫有否催谷兒子添丁，為社會出分力呢？

噚日恒基仲請咗勞工及福利局局長張建宗做主禮嘉賓，原來張建宗07年亦曾為恒基主持「安全年」活動。孫國林憶述當年張主持活動翌日就話要退休，當時佢諗「咁快退休？你就想！」點知畀佢講中，張短暫離開幾個月後就回歸政府做局長。