打開窗簾見魚群 梁志群驚喜

上月剛去完新加坡嘅太古旅遊董事總經理梁志群（Andrew），日前同黛安分享咗好多見聞。Andrew曾於國泰航空新加坡支部任職，對當地相當熟悉，至今不時都會飛過去探朋友。雖然新加坡地方細細，但旅遊景點發展層出不窮，Andrew話每次去都有驚喜。

最近佢去咗全球最大淡水河川生態園River Safari及聖淘沙Ｍarine Life Park參觀，大型水族館固然搶眼，內裏嘅酒店更令佢大開眼界。當日佢一打開酒店房間窗簾，就見到一條條魚仔喺一塊玻璃之外暢泳！原來窗戶正連接旁邊嘅水族館，Andrew呢位旅遊行尊都睇到「嘩」一聲，至今仍讚口不絕。

歎世界不忘環保

本身係郵輪業諮詢委員會成員嘅梁志群話，旅遊事務署正籌備九月喺郵輪碼頭舉行展覽，請郵輪公司同旅行社介紹郵輪旅遊產品，一來可帶大家睇下碼頭設施，二來可推廣郵輪旅遊，希望搞到好似嘉年華會咁，黛安相信會幾好玩。

另外，Andrew去新加坡之前，仲去過南韓參加世界旅遊組織會議，汲取綠色旅遊新資訊。佢話太古旅遊亦有提供「綠悠遊」套餐，可安排旅客住節能酒店及參加道地生態遊，歎世界之餘，又可貢獻環保。

好多人都有儲里數嘅習慣，聽Andrew講原來里數可用來支持減排。好似國泰同港龍航空就有一項「飛向更藍天」計劃，大家可支付里數或現金抵銷碳排放。點抵銷？之前佢哋曾用呢筆資金，資助水力及風力發電等項目，善用再生能源，咁咪可減排囉！