萬寧貓真身易帥 跳港版鄭多燕瘦身操

「咦，咁肥㗎！」聖誕派對開不停，近日增磅不少，聽到有人如此說，黛安不由自主「縮起」肚腩，抬頭望一望才知是電視播放着新一輯萬寧貓廣告。

闊別銀幕多時，可愛貓咪變身大肥貓，旁人冷眼嘲諷，連老鼠都「恰佢」，真是我見猶憐。絕望之際，貓咪遇見韓國人氣瘦身天后鄭多燕，真想快點睇到下集，看看鄭老師點幫萬寧貓「大翻身」。

一周逾15萬人點擊

近年萬寧積極推銷健康，由萬寧妹妹的「我有小小鍾意咗佢」，到劉青雲的「化完粧要落粧，落完粧要化粧」，套套都是話題作，為這家連鎖個人護理產品店吸納不少女粉絲。

萬寧貓回歸，一如以往地受歡迎，上載Youtube一星期，至昨日已有逾15萬人瀏覽。黛安致電製作廣告的Metta Communications創辦人李孔仁（Andrew）打探，他透露貓咪下集將跟鄭老師跳番part「港版鄭多燕瘦身操」，相信幾有戲劇效果，下月十日有得睇。

去年初萬寧貓廣告一出，不但將劇中英國短毛家貓「弟弟」捧紅，就連戴上貓咪頭套的美少女「米米」亦成為網民焦點。聽講為配合鄭老師的舞步，萬寧今次找了另一位有舞蹈底子的演員代替米米扮貓。黛安相信下集點擊定勝上集，事關佳節後姊妹們都有減磅需要。