體壇精英型格硬照 展現無限可能

講起香港之光，最新出爐21連勝的拳王曹星如（Rex）一定榜上有名。黛安最近行過運動舖先知，原來Rex參與咗Nike「AIR MAX 30周年特別企劃」仲拍埋廣告！Rex喺廣告仲真情流露，直言讀書時無任何技能和專長，係一般人眼中的「廢青」，全靠在拳擊上努力才找到方向同認同，佢笑話︰「由默默無聞到21連勝，8,000人坐滿擂台打氣，更證明當初堅持係啱嘅﹗」好多人話經理人阿Jay係Rex的伯樂，其實阿Jay唔多鍾意︰「我覺得咁講抹殺咗Rex嘅努力，呢啲努力得佢一個人做到。」

麥兜都講過「香港嘅運動員唔係臘鴨」，本地傑出運動員當然唔止Rex一個，Nike仲請來去年足球先生葉鴻輝、三度參與奧運游泳選手歐鎧淳、香港跳高女子紀錄保持者楊文蔚，同埋港籃甲一組球員徐遠成等四人助陣，大談點在運動路上創造無限可能。葉鴻輝同歐鎧淳都話，當初做運動員身邊都有好多閒言閒語，全靠不服輸、對自己負責任精神，終於做到出成績。