跑49層樓上怡和 籌$300萬善款

日日運動身體好！由怡和集團一班年輕員工組成嘅怡和親善大使，噚日舉辦「齊步上怡廈」籌款活動，吸引超過550名員工、業務夥伴等參與，齊齊跑上49層高嘅怡和大廈，成功籌到$300萬善款！聽講善款會全數撥捐集團旗下、提倡精神健康嘅慈善組織「思健」，宣揚精神健康信息，做到運動之餘又幫到社會，真係一舉兩得！思健主席班哲明‧凱瑟克話，今年活動主題係「齊步心連心」，唔少人透過活動而互相認識，又見到90名來自明愛同青山醫院、新生精神康復會等復康人士嚟到，為參加者打氣、魔術表演，覺得好感恩。佢提到「趣怪造型獎」今年載譽歸來，好多參賽者都悉心打扮，有趣又搞笑！