「法國五月」藝術節 賞羅浮宮經典藏品

講到文青之國，當然係法國莫屬。每年「法國五月」藝術節都吸引唔少文青朝拜，今年踏入25周年有乜玩？黛安就精挑細選咗幾項不可不去的精采節目，大家去完可以做個「真‧文青」。

講起法國當然會諗起極盡奢華的羅浮宮，香港文化博物館在4月26日至7月24日會舉辦《羅浮宮的創想－從皇宮到博物館的八百年》展覽，展出羅浮宮博物館逾120件珍藏，連鼎鼎大名的法皇路易十四時期的收藏都有得睇！

今年活動請到享譽國際的歌斯邦當樂團來港演繹《太陽王的誕生》，呢套劇目路易十四15歲時曾經親自參演過，夠晒尊貴。今次在港重演就請了法國視像藝術家古奧爾，參考17世紀服裝的鑲花工藝設計投影，帶大眾回味法國皇朝點滴；5月6日只演一場咋。

想去晒咁多場活動但怕資金不足？唔使擔心，事關連續第6年贊助藝術節的馬會慈善信託基金，一早留咗1,500張飛畀基層學生同市民，仲特別為視障同聽障人士安排活動，兼且會通過「賽馬會社區拓展藝術教育計劃」大搞導賞團、工作坊、大師班同免費演出，預計有3.62萬人可以受惠。