八達通VS信用卡 邊個淘寶抵？

用八達通搭車或買嘢飲就多，用來淘寶你又試過未？八達通昨日宣布同阿里巴巴的淘寶網合作，大家只要拎住部有NFC功能的手機及一張八達通卡，就可一「嘟」付款。意味八達通正式由現實世界進軍網絡平台。

黛安昨日率先試用過，真是很方便。假設你在淘寶網睇中心儀貨品，在付款方式一欄選擇八達通，就會見到一個QR code，開啟手機的NFC功能及八達通App（須預先下載）掃描或輸入付款編號，用八達通輕輕啪向機背即可付款，過程不消一分鐘。提提大家，八達通付款功能暫僅支援桌面版淘寶網，手機版暫未適用。

不適用於iPhone

八達通可支付人民幣的嗎？不，支付寶會因應當日匯價，兌換為港幣畀你「嘟」。同信用卡一樣，用八達通淘寶要收手續費，費用為交易額的1.5％。算唔算抵呢？未必。事關用繳費靈（PPS）及中銀信用卡淘寶，手續費一樣是1.5％。至於用其他銀行信用卡淘寶，一般要收3％手續費，雖然「面價」貴少少，但銀行私下亦有提供不同回贈，部分折算後抵過八達通，同時可儲信用卡積分。當然，若你的八達通有自動增值，間接亦在儲信用卡積分。黛安昨日做了個表比較，在此同大家分享。

八達通CEO張耀堂同黛安講，每張卡每日最多可買1000元貨物。若然貨不對辦要退錢，金額會傳到你的支付寶帳戶。

多了個渠道付款，淘寶迷固然開心。不過一班iPhone用家就唔太高興，事關蘋果手機暫不設NFC功能，換言之不能享受新服務。另有姊妹擔心子女拎八達通到網上掃貨，會避免幫他們自動增值。