天際100「High」Tea $50起歎酒店級美食

香港女仔最鍾意High Tea同影靚相，滿足口福又可晒幸福。有乜正得過可以在天際居高臨下Tea一Tea？黛安收到風，天際100香港觀景台的Café 100噚日開幕，係全球首個觀景台擁有由香港麗思卡爾頓酒店管理的咖啡室，主打用乳脂含量達8％的北海道牛奶製作軟雪糕同鹹甜法式蛋餅，嚟緊仲會推出期間限定櫻花味軟雪糕，貼上IG仲唔被人like爆？

睇番餐牌，價錢都相當親民，飲品由$50至$60不等，食嘢都係$80至$90左右，加上成間Café得40個位，份外多私人空間。天際100香港觀景台副主席林寶彤話，去年總入場人次升咗10％，會配合Café出美饌套票吸引更多旅客，只要$250包晒天際100門票、餐飲同輕食，慳到成20％咁多㗎。佢又透露，今次搞Café用咗近半年籌備，單計裝潢已投資逾7位數字。