$285坐水晶巴士 歎米芝蓮遊香港

坐水晶巴士歎米芝蓮？好吸引呀！黛安噚日登上投資高達1,000萬、全港首架巴士餐廳「水晶巴士」，率先睇吓有咩咁特別。巴士外形同一般雙層巴士好似，但用咗以銀色閃爍貼紙裝飾，夠晒醒神呀，踏埋上巴士即刻feel到成個人「升呢」，因為見到車廂用酒廊式設計，以為去咗星級餐廳一樣，上下層有47個位，仲有餐枱方便大家歎米芝蓮美食𠻹！

負責人洪家恆介紹，水晶巴士今日起開動，每日下晝有2團遊走彌敦道、廟街、中環、青馬大橋、青嶼幹綫觀景台等超過20個景點，途中會歎米芝蓮中式點心，車程約2.5小時，仲可以喺一個指定景點落車影相，盛惠380蚊。如果你係香港人，即日至8月底上網訂位，有75折㗎！折咗只係285蚊咋！

晚上專做包團

洪生話巴士夜晚都會出動，「專做包團，想去邊全部由客人話事」，仲會有勝記、全記海鮮酒家、程班長等提供美食，價錢由8,800蚊至12.8萬不等，全程5小時；配埋型格燈光設計、高質音響，仲唔係最潮嘅打機、睇波、唱K新熱點？