中電首辦音樂賽 倡環保共融

要做歌神，識得「放生電」迷倒歌迷自然係第一要務。但魅力電音除了可顛倒眾生，仲可以幫手宣傳慳電架。中電早前請咗香港電影金像獎得獎音樂人戴偉創作、唱作歌手林二汶演繹兒歌《慳電乖乖》，仲首次舉辦音樂比賽，吸引170隊大小朋友一齊「唱這歌」，最終有27支隊伍入圍決賽，當中除咗小朋友，仲有南亞裔少女、長者、智障人士同殘疾人，甚至有隊伍用手語來「唱歌」，令聽障人士都「聽得到」。

講咁耐，邊個贏咗先？原來公開組冠軍由保良局蕭漢森小學奪得；天樂幼稚園就攞咗幼兒組冠軍。中華電力總裁潘偉賢（Paul Sir）都讚比賽可以凝聚到不同年齡、種族同文化背景的人士一齊推廣環保節能。原唱兼評判之一林二汶都讚參賽者創作力滿分，估唔到演繹兒歌都可以千變萬化咁話。