海洋公園園藝耍家 花展贏金獎

細個讀書都知，一到春天想「花天花地花世界」，當然要去香港花卉展賞花。去到花展先知，原來今年的最佳展品金獎係海洋公園攞咗，真係估唔到海洋公園唔止養海洋生物誇啦啦，連園藝設計都有一手。公關姐妹話，適逢海洋公園40周年，今年特別用玫瑰、石竹、矮牽牛及洋葵等鮮花，砌咗個高2.2米的巨型花藝生日蛋糕來賀壽，部分鮮花更採用本地出品，省回空運的碳足迹，又用番啲舊燈罩、托盤和花盆改造成展品，並重複用番種植泥土減少浪費，夠晒環保，難怪連續17年參展都有獎攞。

海洋公園管理及演藝節目執行總監賀倫達就話，今次攞到金獎非常榮幸，大讚作品展出咗海洋公園對環境及自然保育的承諾，仲話部分展覽花卉遲啲會係海洋公園再次展出，等呢份開心share可以延續下去。