球場遇fit爆沈祖堯 馬斐森︰以佢為榜樣

中大同港大足球隊噚日喺球場上，上演咗一番龍爭虎鬥！為紀念兩間大學2003年齊心協力對抗沙士，今年連續第14年舉辦「兩大校長盃教職員足球友誼賽」，特別請來中大校長沈祖堯和港大校長馬斐森主持開球禮，雖然佢哋無落場，但都有「露幾腳」。

早前沈祖堯提及唔再同中大續約做校長，任期最長只會去到2018年，之後會重返醫學院專注癌症研究；而馬斐森明年1月離職後，就會返英國出任愛丁堡大學校長，所以今次亦係兩名校長最一次以校長身份主持賽事，特別有意義。

挑通眼眉嘅姊妹一定睇到，沈祖堯身形明顯比以前fit咗好多，事關佢近年靠「每餐飯量由兩碗變為兩湯匙」、積極運動成功減磅；相反，馬斐森就顯得好有「福氣」，原來佢有留意到沈祖堯減肥成功，仲拍一拍自己肚皮話︰「我會以佢做榜樣。」

中大2：0取勝

馬斐森話以前會踢波同打欖球，但依家工作忙，無乜時間運動，但每個周末早上依然會抽時間行山，因為佢覺得香港自然景色好靚！而沈祖堯就話任內會推動更多運動設施落成，包括划艇等團體運動，希望鼓勵學生運動！

講番場比賽，兩隊上半場互交白卷，下半場中大先後入兩球，以2:0完場，連續三年摘冠。