May姐東坡肉 絕配蒙氏靚飯

近年香港大吹韓風，代理電飯煲起家的蒙氏家族，最近亦引入韓國電飯煲CUCKOO，仲搵埋靚仔韓星李昇基代言，未開飯一班OL已流晒口水。日前黛安試食過新煲的飯，得出四個字─香甜煙韌，原本打算趁夏日瘦身減吃澱粉質的黛安，亦忍唔住把碟上的靚飯吃清光。

早前信興集團副主席蒙德揚（David）宴客，並搵了「May姐」馮美基「出手」，到他在上環開設的廚房Showroom下廚畀一班好友歎。May姐用她精湛的廚藝配上雞汁的鮮味，炮製出一清一濃的素菜釀雞翼及栗子東坡肉，食到席上賓客「舔舔脷」。

煙韌甜飯 15分鐘煲熟

一般東坡肉主要以糖、醬油及紹興酒調味，黛安聽May姐講，她的獨門秘方除了雞汁外，仲有韓式燒烤汁，加埋紹興酒落鍋炆，製成品濃而不膩；配上經CUCKOO高氣壓及高溫煲出來的煙韌米飯，簡直絕配。聽講這部4,000多元的電飯煲設15分鐘快煮功能，下次唔記得煲飯都可快速「補飛」。

當日May姐邊煮邊與David的家姐蒙倩兒（Cynthia）討論心得，一聽就知Cindy亦是「廚房中人」。她事後告訴黛安，自己熟讀晒May姐的食譜，但煮的步驟就交予工人；又透露囡囡不時焗蛋糕畀佢食，所以經常大飽口福。