南豐紗廠搞車衣賽 回味職場舊事

本港紡織業於60、70年代盛極一時，當年嘅「棉紗大王」陳廷驊更加首創24小時3更制生產。不過之後工業北移，本港經濟轉型，紡織廠亦都相繼停產。南豐紗廠就係上世紀60年代香港「三大紗廠」之一，早幾年南豐集團宣布會活化呢間有60年歷史嘅工廈，成為fashion界嘅新地標「The Mills」，黛安都好期待。

明年中落成

早兩日食lunch見到項目揸fit人陳卓卓（Cherry），梗係八卦下The Mills嘅進度喇！Cherry話，工廈活化大約明年夏天就會落成，將有3大支柱，包括創業家incubator南豐作坊，主張體驗式零售嘅南豐店堂，同埋獨立非牟利嘅六廠基金會。

雖然工廈未活化完成，但好多項目已經run緊，Cherry仲分享咗好多趣事，例如六廠基金會舊年就搞咗個「夏日共學」campaign，喺南豐紗廠所在嘅荃灣社區，舉辦咗一系列活動同街坊交流。Cherry話，因為以前好多人都會喺番當區就業，所以紗廠唔少舊工友其實都住荃灣，基金會於是喺荃灣一間茶餐廳，搞咗個「車衣速度賽」，有街坊經過見到，好興奮咁話「我以前就係做車衣！」仲落場比賽，果然好快手就車好晒！