項明生電台開咪 穿梭古今確係威

黛安呢排確係夠運，之前去「你我的香港」講座竟撞見元祖級美魔女陳美齡，原來她應姐姐陳曦齡邀請，專程由日本返港分享當初追夢過程。同場仲有旅遊達人項明生（James）都係咁讚陳美齡保養得宜，完全唔似60幾歲，簡直似「凍齡」。講起美齡姐姐就諗起靚聲，傾開先知James早排都搵咗唱歌老師學用丹田氣，養靚把聲做佢個新電台節目《全世界嚮導》咁話。

James話雖然出開書又做過電視節目，但開咪「賣聲」都係第一次，初嘗做DJ嘅佢直言擔心自己講嘢太快；但講到用聲音帶大家去旅行，James話自由度反而大咗，「個節目會穿梭古今，如講下古羅馬同中國關係咁，剩用把聲，少好多特效易好多。」明晚節目就有另一日本旅遊達人杜如風撑場，一齊講下對日本愛恨，記住10點半等住聽了。