GU月底落戶香港 尖沙咀銅鑼灣開店

好消息！大家引頸以待嘅GU鐵定3月31日開張喇！主打日本東京至潮至型、適合一班後生仔嘅服飾店GU，當日將先喺尖沙咀美麗華商場開本港第一間分店，超過1萬平方呎，而緊接4月1日再喺銅鑼灣皇室堡開第二間分店。黛安收到風，今次GU拓展香港市場，無論喺店舖設計、商品、服裝襯搭都精心設計過，董事長柚木治希望，為港人帶來嶄新體驗，畀大家緊貼日本最in最update嘅時裝，仲可以用平易近人嘅價錢買到靚衫呀！

聘請200人

聽講GU今年會請4名店長，當中兩位由日本調配來港，而香港嘅團隊就親身飛到去日本總部受訓，確保香港分店可按日本標準快速走上軌道。

講到香港嘅團隊陣容，佢哋會請200名全職或兼職。黛安想特別介紹一下，員工入面有一支獨有嘅Osharista時尚顧問專員。聽個名已經好勁，原來佢哋受過專業培訓，由美學概念、色彩搭配、配襯建議，以至彩粧技巧等技能都訓練有素，熟悉時尚潮流，個個係潮女，專門為客人提供配襯建議，真係好想試下呢種新服務呀！適逢新店開幕，GU特別為港人推出日本以外首個app，登記做會員後就可享迎新禮物，包括限定優惠、10蚊優惠券、生日優惠券等，驚喜多籮籮，千祈唔好錯過呀！