迪士尼春日嘉年華 親子學做cupcake

春天嚟喇！香港迪士尼樂園今個春天會將迪士尼打造成明星春日樂園，今個月16號至5月28號會舉行大型嘉年華，超過100位迪士尼朋友以唔同形式登場，希望帶畀大家青春活力嘅感覺！黛安已經做定資料搜集，仲同公關姊姊八卦咗最新消息呀。

原來活動期間樂園會有七彩繽紛嘅花藝同迪士朋友主題布置，米奇、米妮、唐老鴨、高飛、迪士尼小熊Duffy同ShellieMay等亦會換上春日新裝，連同30多位迪士尼明星、60位舞蹈員一齊喺「迪士尼明星嘉年華列車」同大家見面，到時一定好熱鬧，唔可以錯過呀！

同咁多朋友仔集完郵影相，去到園內嘅「夢想花園」，除咗有以小熊維尼、小鹿斑比等做主角嘅春日布置，80多隻迪士尼朋友將會化身成趣致「花蛋」，匿埋喺園內唔同地點，等大家尋寶。玩到咁開心，當然要唞一唞享用美食啦！樂園同兩間主題酒店將會推出55款主題食物；而迪士尼好萊塢酒店亦會喺逢星期日晚上，為光顧「米奇廚師餐廳」自助晚餐嘅3至11歲小朋友同父母，免費提供cupcake親子DIY工作坊，製作充滿春日氣息嘅cupcake，有得食又有得玩，記住唔好錯過呀！