麥當勞一姐宴客 大談「新世代用餐體驗」

噚晚黛安應麥當勞一姐Randy（黎韋詩）之邀，去咗Grand Hyatt食咗好難忘的一餐。晚宴喺酒店池畔餐廳舉行，最令黛安深刻的是臨尾酒店大廚親自開腔，成餐飯由頭盤的蝦沙律、龍蝦洋蔥湯、主菜烤雞腿及牛肉卷，以至甜品，原來都係用麥當勞的食材炮製，認真驚喜！

黛安聽Randy講，麥當勞稍後仲有好多驚喜處處的新搞作。昨晚佢不停提住「新世代」服務和用餐體驗，原來佢打算將麥當勞由fast food shop，升格做fast casual restaurant，亦意味麥當勞的食品、服務，以至方便程度的大革新。相信大家都留意到，最近不少麥當勞已轉用自助點餐機，Randy話現時240多間麥當勞分店，60間已增設呢項服務，但電子化唔代表人手過剩，Randy話同事只係由以往喺櫃枱後服務顧客，改為喺櫃枱前教大家點餐。

稍後佢哋亦將會喺全球推出一個手機點餐的app，日後只需一指觸控，就可付款點餐，諗起已覺得好方便。

仲有，Randy話早前佢哋推出「MyVoice麥麥聽」應用程式，讓客人透過手機就餐廳服務畀意見，原來至今已有7萬人下載，並提供85萬feedbacks，當中一半都係讚佢哋同事，證明餐廳服務得到肯定。不過黛安最感興趣的是聽見Randy話後日（3月9日）開始，60間提供自助點餐服務的餐廳，將為3款指定的「My Signature Burger」提供DIY服務。大家可透過點餐機隨意mix & match，在3款漢堡包、3款肉類及3種口味當中自配心儀配搭，換言之可做出27種變化，聽到呢到黛安已急不及待想試！