春茗嘗咖喱

每年出席信興集團的春茗，最期待的便是品嘗蒙氏咖喱，皆因食譜從不外傳，傳媒要一嘗咖喱便得等這個場合。信興大老闆蒙德揚話咖喱無落糖，只用蘋果汁帶出甜味，食完唔會熱氣。蒙氏咖喱辣得起勁，配上萬元飯煲煮出來的米飯同吃，寧舍滋味。那天的菜單，十分講究，以海鮮青菜為主，原來是信興董事蒙倩兒小姐早在一個月前親自揀選，配咖喱牛腩便恰到好處。

當然不少得的是見識其新產品，今次便見到一個顏色醒目的搬運輔助架，只要戴在腰背上，搬運時其腰旁的兩個滾輪便會協助借力，減輕腰背的負擔。

蒙生身為職業安全健康局成員，故入貨都關注埋職業安全，希望更多公司引入，令工人受惠。

有同事即場為傳媒量度頭頸弧度，原來另一產品是根據個人頭形和睡眠姿態特製的枕頭，都市人睡眠質素一向麻麻，遇到如此個人化的枕頭，值得一試。

同場還碰見「AO歌王」楊立門，次次見佢都有新搞作，但都離不開慈善事。

他將於4月8號舉行慈善演唱會，為香港防癌會籌款，只演一場，各位買飛支持啦！

（本欄逢周一刊登）