$10入場 尖沙咀睇港產玩具展

嘩！見到有成百隻「白兵」出現喺尖沙咀香港歷史博物館外，搞邊科呢？原來今日起至5月15日，博物館會舉行「香港玩具傳奇」展覽，除有百隻《星球大戰》「白兵」駐守外，仲有成千隻可愛黃色小鴨大晒冷。咁難得可以一次過睇晒咁多香港製造嘅玩具，一定要去啊！

適逢香港特別行政區成立20周年，呢個展覽係慶祝活動之一。打頭炮已經好吸引，展出超過2,000件玩具，包括唔同年代嘅經典玩具，好似公仔紙、換裝紙娃娃、煮飯仔、鐵皮玩具等等，仲有極期待嘅《機動戰士高達》、《變形金剛》、芭比公仔！標準入場費都係10蚊，小童半價5蚊咋！