東海堂開Cafe 和風潮食吸客

賣開西餅的東海堂，近年生意愈做愈廣。去年部分餅舖做埋飲品生意，開賣紅豆抹茶、布丁奶茶等特飲，最近仲「撈過界」開咖啡店，首間名為「arome cafe」的食肆月前在葵芳新都會廣場開業，走年輕型格路綫。黛安之前去試食見不少後生女幫趁。

餐廳設計摩登，木紋枱凳加上微黃燈光，讓人覺得好溫暖。黛安聽市場部的Virginia講，裝潢以北海道牧場為藍本，其精緻的西餅櫃固然吸引眼球，餐廳仲有一個芝士專櫃，每當有人Order招牌的花畑芝士意粉，侍應出餐前會將意粉捧到該處，將「大大嚿」的花畑牧場古烏達芝士磨成粉，堆到好似一座雪山咁，見到已食指大動。

芝士意粉外，日式牛乳雪糕窩夫亦是該處的招牌菜，黛安當日見隔籬枱的學生妹食到「舔舔脷」。餐廳仲有一個「Salad Corner」，每日輪流供應不同的和風沙律，客人可自由配搭，相信幾受OL歡迎。

將推法式拿破崙

遲下餐廳並將推出即製又鬆脆「法式拿破崙」，Virginia話到時會請黛安試食。現時全港只有一間arome cafe，但據講東海堂已密鑼緊鼓，在尖沙咀及旺角等潮流旺區睇舖，相信明年會有多幾間分店。