渣打一姐夥舊部 搞基金業務

人稱「一姐」的渣打大中華區主席曾璟璇（Katherine），日前宣布為追求個人新挑戰提早退休，做埋今日就同效力22年的渣打Say Goodbye。

投資有道 炒樓賺數千萬

一班金融及銀行界朋友都好關心Katherine的「個人新挑戰」到底係乜東東，黛安昨日收到風，原來她將針對香港及內地市場，成立一個對沖基金和私募股權基金業務，並已找來舊同事兼渣打前中國區公司事務總監黃書雅（Sheila）一齊打江山。

身為前特首曾蔭權妹妹的Katherine同Sheila一向老友鬼鬼，二人不但是舊同事，感情仲好到一齊聯名買樓。早年她們聯名購入的紅山半島，09年沽出時帳面賺約千三萬。事實上Katherine一向活躍於地產市場，有報道指她多年來投資逾十個物業，其後轉售賺逾3000萬元，足證她投資有道，眼光獨到。

至於Sheila除做過渣打高層，亦曾於國泰、香港電訊等任職，「服侍」過陳南祿、張永霖、李澤楷、王冬勝等星級CEO。09年她離開銀行搞飲食，與朋友開設西班牙餐廳FoFo by el Willy亦辦得有聲有色，食家如葉澍堃、盧覓雪都是其捧場客。