恒隆明星賽今晚舉行 同事渾身解數爭冠軍

農曆新年過後，好多公司都趁呢個時候請員工食Annual Dinner，恒隆都唔例外。昨日黛安同幾位恒隆高層食飯，佢哋講起今晚會同香港區嘅同事食番餐，答謝大家一年來嘅辛勞。

其實佢哋上個星期開始，已經馬不停蹄北上內地，去到上海、濟南同大連和同事食飯，其中一日仲撞正情人節，令幾位管理層無時間陪伴家中嬌妻與情人。搞到恒隆董事總經理陳南祿（Philip）昨日對住集團傳訊助理董事關則輝（CF）笑說︰「真係好安排啦！」CF話要遷就好多人嘅日程，不過恒隆主席陳啟宗嘅囝囝陳文博（Adriel）又跟着笑說無問題，話呢個係一個好好嘅「藉口」，可以逃避情人節正日慶祝咁話。大家聽到都笑晒口，話估唔到佢未結婚已經有咁嘅諗法。每次黛安和他們吃飯，黛安都感覺到他們好玩得，又講得笑，好有默契，難怪恒隆近年生意做得唔錯。

講番Annual Dinner，原來除咗食飯之外，仲會有一個員工表演環節。CF話睇完各地演出，深深感受到各地大不同：譬如比較繁華嘅上海，表演就有勁歌熱舞；而濟南為文化名城，同事嘅表演亦相對古雅一點，有古箏及相聲等項目；至於大連，表演就開放啲。

多元活動 發揮所長

查實恒隆周不都會舉辦多元活動畀同事參加兼聯誼，好似去年底，公司就搞咗個「恒隆明星賽」，讓擁有不同天賦與才能嘅同事發揮小宇宙，有人會扮鬼扮馬，亦有人載歌載舞。今晚佢哋就請咗內地十個城市嘅冠軍人馬，加埋香港隊伍，一齊競逐明星賽總冠軍，相信一定好有睇頭。黛安喺度預祝佢哋Good Show！