百本醫護新office 設模擬病房培訓

今時今日，人生70歲不再「古來稀」，但人口老化問題確實令醫療服務非常緊張。黛安知道主打24小時私家看護服務嘅百本醫護控股，最近總部搬咗去尖沙咀星光行，老闆關志康（Jacky）上星期五舉行啟用禮，仲請到食物及衞生局局長高永文出席，認真巴閉！

黛安參觀完百本新office，覺得呢度認真唔錯，接近2萬呎嘅空間有模擬醫院病房，除咗可做培訓，仲可出租作拍攝之用！Jacky同黛安講，自己10年前做過公務員，沙士後感到醫護人員需求大，因此創業，由於佢唔係醫護行業科班出身，坦言初時都遇到唔少困難，但仍堅持做好服務，結果由一張寫字枱起家，發展到現時上市規模！Jacky話新辦公室會集中加強培訓人手，希望提升業界水平。佢又話，好多患長期病嘅長者唔想住安老院，所以私人看護需求大，過去半年佢公司呢方面嘅服務就勁升40％。他直言提供高質服務更重要，仲笑言「Google都找不到任何投訴」！