荷里活廣場 着高踭鞋競跑

有人話「女人最痛」就係着高跟鞋，但女人又貪靚又怕痛，黛安都感受良多。荷里活廣場趁婦女節向女士致敬，連續第8年舉辦「高跟鞋競跑大賽」，噚日起可以報名參加，而且不限女士們，連男士都可報名，畀機會一眾男士體會女士背後嘅「辛酸」。

今年嘅競跑大賽提前喺星期日舉行，即3月5日，分為「男子組」、「女子組」及「情侶組」，年齡不限，但要自備鞋踭不少於2吋嘅高跟鞋，情侶組比賽時，更規定要手牽手參賽。正所謂分甘共苦，要捱一起捱！冠軍可以攞走3,000蚊現金券！

另外，3月8日婦女節正日，荷里活廣場與香港基督教女青年會合辦博藝節，除免費派發紅棗茶外，仲有壓花、氣球紮藝、串珠、健體操等表演。