概念店換餐單 7-Eleven一姐李綺雯 最愛炒蛋牛角酥

喺金鐘呢個繁忙商業地段，「搵食」真係唔易！黛安早幾日經過金鐘力寶中心，見到7-Eleven概念店最近換咗新Menu，發現午市時段加入咗鰂魚涌同灣仔分店hit爆嘅「雙餸飯」，仲有鳳爪排骨飯同土魷肉餅飯兩款中式蒸飯，估唔到便利店都有咁多選擇，真係新鮮感十足！

雙餸飯日日轉款

查實黛安一直都係金鐘7-Eleven概念店嘅忠實顧客，經常幫趁佢嘅牛角酥，最近新出嘅炒蛋牛角酥，更加係黛安嘅「早餐新寵兒」，每份$20，支撑起一天嘅工作。昨日同新近上任嘅「7仔一姐」Elman（7-Eleven香港及澳門營銷及市場部董事李綺雯）傾開，原來佢都係炒蛋牛角酥嘅粉絲，Elman話最鍾意每層酥皮鬆脆分明，牛油香味撲鼻，加上即製炒蛋，入口熱辣辣好滋味！另外雙餸飯亦係佢嘅推介，現時概念店每日提供4款不同餸菜，款式日日唔同，例如咖喱牛腩、魚香茄子等，好有「家的感覺」。

唔經唔覺，呢間意念創新嘅金鐘概念店已開幕約一周年，Elman話留意到下午茶時段嘅咖哩魚蛋、燒賣以及新推嘅火腿蛋出前一丁麵都係舖頭嘅人氣產品，可以幫各位上班族充充電。不過計黛安話齋，講到叉電實在唔少得佢哋杯手調咖啡，飲完先至夠醒晨！