越南餐廳Minh & Kok $30歎超值下午茶

香港人工作至上，有時忙到連飯都唔記得食。日前黛安下晝經過太古城中心Treats，試咗越南餐廳Minh & Kok，個餐牌好似港式車仔麵，可以自選湯底、麵或飯、配料等，星期一至五下午茶時段3至6點都係30蚊起，好適合做個late lunch。

聽公關姐妹講，原來佢係今個月先推出下午茶餐，最有驚喜就係有飯底，「牛河湯飯或者冬蔭公湯飯都好正」，30蚊可自選湯底加麵或者飯，包嘢飲，但就無配料。如果要加配料，有24款提供，每款都係5蚊，已經有流心蛋、燒豬頸肉、秋葵。再唔夠飽，仲有炸軟殼蟹、燒老虎蝦、焦糖燉蛋，每款加15至25蚊不等。

公關姐妹話，所有湯底都係經過廚師精心熬製至少3至4小時，越式牛肉河湯仲要熬過夜，「就好似一個upgrade咗嘅車仔麵。」