科大女生馬術賽奪亞 6歲習騎冀出戰奧運

唔少香港人識騎馬，但並非人人都咁叻。20歲嘅科大3年級生梁藹文啱啱喺「浪琴表香港馬術大師賽」青少年挑戰賽中贏咗亞軍，身為賽馬會青少年馬術隊成員嘅她，6歲已經開始習騎，7年前加入馬術隊後，每年暑假都喺馬會資助下到歐洲集訓同參賽，仲攞咗多屆馬術之王的「年度騎手」大獎，經驗相當豐富。藹文都話︰「去歐洲見識到優秀騎手，才發覺世界原來咁大。」

除咗騎術，依家喺科大讀機械工程學的藹文讀書一樣咁叻，曾經喺英國高級程度會考獲得2A及1A*佳績，仲係八級鋼琴好手。但佢為咗習騎，藹文都有唔少犧牲，每周有6日要集訓，經常要上水、科大兩邊走，每日最少練成3、4個鐘。但藹文話，一早知呢條路唔易行，未來最想代表香港參加奧運同亞運呢啲大型國際比賽，希望騎術可以媲美歐美騎手。