奇華新店登陸灣仔 1個老婆餅賣5毫子

所謂潮流好似一個圓圈，古老嘢隔一排又會興番。經營近80年的奇華餅家，最近就揀咗灣仔三級歷史建築物嚟做特色旗艦店，仲特別喺店舖設計度融入奇華1938年創業時的風味，又請咗Art Dreamers的藝術家喺舖頭度畫咗「石板街」牆畫，大賣老香港情懷，夾埋日日即焗冬蓉老婆餅、皮蛋酥、叉燒酥等港式餅食，用來打卡影相意境爆燈。舖頭裏面仲放咗由香港微型藝術家陳慧姬同黎熾明整的兩組微縮模型，重現番奇華喺五、六十年代上海舖頭中秋過節時的熱鬧場景，想體驗老上海感覺都無難度。

公關姐妹話即日至星期日前，旗艦店會用經典價賣現烤老婆餅，每個只係5毫子咋！每日只限賣188盒（每盒4個），每人限買一盒；而到本月16日前喺旗艦店買任何嘢都有8折！