會展歎精緻春茗 雞仔奶皇包最吸睛

現代人食飯最緊要「相機食先」，黛安都唔例外，昨日將午餐品嘗過的雞仔奶皇包上載面書，好友隨即讚好並留言問：「啲餸好精緻！你去咗邊度食飯？」成功吸Like當然開心啦。其實呢餐好食又好睇的午宴係會展管理公司的靚女董事總經理Monica（梅李玉霞）請黛安食㗎！

昨日係會展管理公司的新春午宴，Monica請食飯之餘仲同大家報喜，回顧對上一個財政年度，原來會展一共舉辦咗1,149項活動，成績好好；剛過去的10月仲迎來自1988年開業以來第1億名訪客，對會展來講真係別具意義。緊接新一年亦有過千項盛事喺會展舉行，譬如下個月11日就有「神奇小子」曹星如（Rex）喺呢度大戰日本WBO亞太區冠軍向井寬史，爭取21連勝，黛安都買咗飛入場幫Rex打氣，諗起已經熱血沸騰，好期待呀！

8人打掃全館玻璃窗

席間Monica亦講起大掃除問題，其實會展咁大，要打掃真係一啲都唔易，單係玻璃外牆面積已有31,640平方米、相等於四個足球場咁大。聽Monica講，原來咁大範圍的玻璃窗，全由八個人負責打掃，由於打掃外牆要睇天氣，擦拭內側亦唔能夠影響參展商運作，他們只會在不影響他人的深夜默默進行，平均3個月才可把全部玻璃完整抹一次。大家可享受咁清潔同閃令令的環境，真係要畀啲掌聲佢哋！