跨國人工受孕 7隻導盲犬BB出世喇！

新正頭喜事重重！七星報喜呀！無錯，7隻導盲犬BB上月18日喺香港出世喇！黛安噚日同香港導盲犬協會寄養家庭督導主任陳穎芝（Fish）傾BB嘅近況，佢話4男3女狗BB，3隻係金棕色、4隻係純黑色，全部都肥嘟嘟好健康，比出生時重咗，依家每隻有大約1公斤，佢哋仲未改名㗎，不過會跟輩份以「P」字行頭。

4男3女 「P」字頭命名

原來7隻BB來頭唔簡單，媽媽係擁有金毛尋回犬與拉布拉多犬血統、只有1歲半有黑色毛色的Eve，由領展斥資購買，至於爸爸就係金棕色的拉布拉多犬，都係來自澳洲。講番今次孕育7隻BB，Fish坦言，協會透過冷凍精子技術，由澳洲速遞狗隻精子到港，進行首次跨國人工受孕，認真厲害，「獸醫最初估計成功率不高，只能誕下4至5隻小狗，結果有7隻，大家好意外」。

Fish透露，Eve去年11月中接受人工受孕，「狗隻經期一般有21至28天，幾乎每天都要估算Eve的排卵期，遇到排卵期前，要即時通知澳洲導盲犬學校，採集狗爸爸的精子速遞到港，因受孕時間只有48小時，所以是與時間競賽。」狗BB通常在2至3周大開眼，其中二佬噚日睜開眼喇，而且7兄弟姊妹爭吃奶時，會不斷左右搖動，真係「巧打耳」呀！