康泰黃進達 夫妻檔學韓文

農曆新年是旅遊界最忙的季節，康泰老闆黃進達（Jason）竟抽閒約黛安食飯，認真唔話得。

近年韓風大熱，帶動康泰韓國團每年都有雙位數增長。Jason自言是韓國文化粉絲，煲劇之餘亦會追看《Running Man》等綜藝節目，順便發掘新景點。下個月起，他仲請了位韓國導師一對一受訓，每周上一堂韓文班，仲笑言會捉埋太太一齊學，培養夫妻間的共同興趣，認真開心。

黃士心伊朗過年

康泰有Jason睇住，作為爸爸自然放心。所以康泰董事長黃士心早已帶埋老婆和一班老友飛去伊朗度假，順道在該處過年。聽講黃老闆原只搵幾個老友去，但旅遊教父的魅力及號召力實太強，最終有成廿人跟他「報團」出遊。

雖然黃士心已將旅行社業務交畀Jason打理，但自己依然無時停。除了忙同朋友聚舊，亦馬不停蹄繼續他的出書大計。話咁快他的「玩番天系列」旅遊書已出到第四本，昨日Jason仲將爸爸新鮮出爐的台北書贈黛安。下月底鍾情跑馬的教父會做埋榮譽領隊，帶團去杜拜睇「賽馬世界杯」𠻹。

前年結婚的Jason告訴黛安，最近找了八位名攝記，幫新人到歐洲及日韓熱點影婚照，更透露自己幫趁過其中一位。黛安好想知是誰，他卻蠱惑地說遲些會在婚展擺檔，去到就知。可惜黛安仲未有人求婚呢。