曾智華9月台灣玩住做善事

明日大家有咩節目？黛安會去會展國際旅遊展一趟，捧《經濟日報》專欄作家曾智華（Luke Sir）場，聽下他早前同老婆去台灣旅行的所見所聞（明午四時在旅遊展「台灣區」旁演講廳開講）。

因乜解究Luke Sir會講台灣呢？原來他為籌備今個月出版的新書《拖住老婆去旅行》，三月特地帶老婆去台中、台南同金門玩一個月。舊年退休的Luke Sir實際退而不休，是次去台灣，玩之餘仲走訪了當地多家著名食肆，一邊介紹旅遊好去處，一邊導賞這些名店創辦人背後鮮為人知、震撼人心的故事。

九月與石Sir帶團

黛安問Luke Sir同太太去完台灣感情有無增進？他笑住話老婆跟他出遊應該好辛苦，事關他唔識普通話，全程要靠老婆繙譯，事前訂機票同做資料搜集亦要老婆幫手；返到香港又要充當秘書，將老公的手稿打入電腦，白頭髮都多了。聽講旅程中兩公婆發生了一些爭拗和趣事，不過老婆睇完話唔出得，最後刪走了。

他又向黛安透露，九月開始會同安達旅運合作開辦三團台灣旅行團。團友只要在團費以外多捐1000元，就可跟Luke Sir去旅行。另外每團仲有一位星級嘉賓隨行，其中兩位已塵埃落定：一位係《經濟日報》副社長「石Sir」石鏡泉，另一位係「股壇小辣椒」青姐胡孟青，去旅行之餘仲可以問下股票貼士。