傑出財富管理師頒獎禮 中銀香港囊括3大獎

香港作為國際金融中心，銀行界同金融業界對經濟貢獻良多，經濟增長背後全賴好多從業員默默耕耘。上星期黛安去港麗酒店出席一項好有意思的活動，就係由CTgoodjobs、香港銀行學會同Benchmark主辦的「傑出財富管理師大獎」頒獎禮。

陳家強主禮

頒獎禮其實已經係第十屆舉行，聽個名已經知道，目的係為咗表揚出色的Financial Management Planner啦！當日好多銀行同金融界的精英同管理層聚首一堂，大會仲請到當時出任署理財政司司長陳家強做主禮嘉賓，星光熠熠，睇到呢個陣容，就知道活動有幾盛大啦！

講番當晚最矚目的「傑出財富管理師大獎」，按年資及客戶組群分成3個組別，無獨有偶，呢3個組別的最高榮譽大獎Grand Award，分別都由中銀香港的同事奪得！認真犀利！適逢今年係中國銀行在港服務100周年，能夠喺業內盛事囊括多個大獎，對中銀嚟講可以話錦上添花。

當日黛安仲遇到經濟日報集團董事總經理麥華章社長，原來佢都係頒獎嘉賓之一，負責頒發「最佳提名機構獎」畀各金融機構得獎代表，表揚佢哋積極為業界培育優秀人才之餘，仲提名同事攞獎，對業界可謂有功又有勞呢！