為貧困女孩起跑 籌款助學

喺呢個男女平等嘅年代，一啲發展中國家嘅女性仍然因性別而受到歧視。國際培幼會（香港）總幹事蕭美娟（Kanie），早前就去咗柬埔寨探訪一班年輕女孩，佢同黛安講一個16歲女仔，因為家境貧窮要輟學結婚，但因為自行服食成藥，再加上勞碌工作，喺懷孕6個月嘅時候不幸流產，真係聽者心酸。為咗幫呢班失去學習機會嘅女仔，培幼會喺4月9號會舉辦「愛‧女孩起跑！」慈善跑，籌得善款會用於讓女孩接受教育、提供職業培訓、提倡女孩權利以免早婚及性暴力等威脅、監測女孩情況，希望大家踴躍支持啦！